Касперский компанийн судлаачид Microsoft Windows-ийн Desktop Window Manager (DWM) хэмээх бүрэлдэхүүнээс “тэг өдрийн” буюу zero-day эмзэг байдлыг (CVE-2021-28310) олж илрүүлсэн байна. Энэхүү эмзэг байдлыг хакерууд аль хэдийн ашиглаж эхэлсэн гэж үзэж байна.
Орчин үеийн Microsoft Windows үйлдлийн системийн window буюу цонхтой интерфейсийг хэрэглэгчид бүгд мэднэ. Программын цонхны гэрлийг хаах, сүүдэрлэх, ил тод байдал зэрэг шинж чанаруудыг үзүүлэх үүрэгтэй бүрэлдэхүүн хэсэг бол Desktop Window Manager юм. Энэ нь программуудын цонх бүрийг дэлгэцэн дээр зурахаас гадна шаардлагатай мэдээллийг буферт хийж өгдөг.
Хэрэглэгч нэг цонхыг нөгөө цонхон дээгүүр шилжүүлэх үед тухайн программууд цонхоо сүүдэрлэх ёстой талаар хяналт удирдлага байдаггүй бөгөөд Desktop Window Manager нь программ бүрийн буфер дээрх мэдээллийг авч хэрэглэгчийн харж буй нийлмэл дүрсийг үүсгэдэг байна. Энэ нь Vista-гаас хойших Windows-ийн бүх хувилбаруудад байдаг үйлдлийн системийн гол бүрэлдэхүүн ба Windows 8, түүнээс дээш хувилбаруудад идэвхгүй болгох боломжгүй байдаг.
Энэхүү эмзэг байдал нь эрхийг зохицуулалтын буруу тохиргооноос үүдэлтэй бөгөөд программ нь Desktop Window Manager-ийг хуурах замаар хандах ёсгүй хэсэгт нэвтрэх боломжийг олгох юм. Улмаар халдагчид хэрэглэгчийн компьютер дээр дур мэдэн код ажиллуулах, хяналт удирдлагыг олж авах эрсдэлтэй байна.
Microsoft компаниас энэхүү эмзэг байдлыг нөхөх аюулгүй байдлын шинэчлэлтийг 4 дүгээр сарын 13-нд гаргасан бөгөөд судлаачид шинэчлэлтийг даруй суулгахыг зөвлөж байна.